نذیر چوہان 2 دن کے ریمانڈ پر FIA کے حوالے

63 Views

پاکستان تحریکِ انصاف کے پنجاب اسمبلی سے تعلق رکھنے والے گرفتار رکن نذیر چوہان کو لاہور کی عدالت نے 2 روزہ ریمانڈ پر ایف آئی اے کے حوالے کر دیا۔

لاہور میں نذیر چوہان کو ضلع کچہری میں مجسٹریٹ کے روبرو پیش کر دیا گیا۔

مجسٹریٹ نے نذیر چوہان کو 2 دن کے ریمانڈ پر ایف آئی اے کی تحویل میں دے دیا۔

عدالت نے ایف آئی اے کو نذیر چوہان کو 31 جولائی کو دوبارہ پیش کرنے کی ہدایت بھی کی۔

واضح رہے کہ پی ٹی آئی جہانگیر ترین گروپ سے تعلق رکھنے والے نذیر چوہان کو وزیرِ اعظم عمران خان کے مشیر برائے احتساب شہزاد اکبر کی جانب سے درج کرائے گئے مقدمے میں ایف آئی اے سائبر کرائم نے گرفتار کیا ہے۔

اس سے قبل انہیں 2 روز پہلے پولیس نے شہزاد اکبر کی جانب سے درج کرائے گئے مقدمے ہی میں گرفتار کیا تھا جس پر ان کی گزشتہ روزضمانت پر رہائی ہوئی تھی۔

نذیر چوہان کیخلاف ایک اور مقدمہ درج

لاہور میں پاکستان تحریکِ انصاف کے جہانگیر ترین گروپ سے تعلق رکھنے والے گرفتار ایم پی اے نذیر چوہان کے خلاف ایک اور مقدمہ درج کر لیا گیا۔

ایم پی اے نذیر چوہان کے خلاف تھانہ گرین ٹاؤن میں بھی مقدمہ درج کر لیا گیا ہے۔

مقدمہ ایس ایچ او گرین ٹاؤن صغیر احمد کی مدعیت میں درج کیا گیا۔

مقدمے میں کارِ سرکار میں مداخلت، جان سے مارنے کی دھمکیوں سمیت دیگر دفعات شامل کی گئی ہیں۔

درج کی گئی ایف آئی آر کے متن میں کہا گیا ہے کہ آزاد کشمیر الیکشن کے دن نذیر چوہان اپنے کو آرڈینیٹر اور 25 نامعلوم افراد کے ساتھ پولنگ اسٹیشن آئے۔

متن میں مزید کہا گیا ہے کہ ایم پی اے نذیر چوہان نے ایس ایچ او سے بد تمیزی کی، انہوں نے پولنگ اسٹیشن کے اندر زبردستی جانے کی کوشش بھی کی۔

ایف آئی آر کے متن میں یہ بھی کہا گیا ہے کہ پولیس کے روکنے پر نذیر چوہان نے جان سے مارنے کی دھمکیاں بھی دیں۔

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے